CTET 8 Feb 2026 Paper 1 Kannada Language Question Paper with Answer Key

ನಿರ್ದೇಶನ : ಈ ಕೆಳಗಿನ ಲೇಖನ ಭಾಗವನ್ನು ಓದಿ, ಅನುಸರಿಸಿ ಬರುವ ಪ್ರಶ್ನೆಗಳಿಗೆ (ಪ್ರಶ್ನೆ ಸಂಖ್ಯೆ : 91-99) ಸೂಕ್ತ ಉತ್ತರವನ್ನು ಆರಿಸುವುದರ ಮೂಲಕ ಉತ್ತರಿಸಿ.
ಮುಮ್ಮಡಿ ಕೃಷ್ಣರಾಜ ಒಡೆಯರ ಚರಿತ್ರೆಯೊಂದಿಗೆ ಗಾಢವಾಗಿ ತಳುಕು ಹಾಕಿಕೊಂಡ ಹೆಸರು ‘ಬಕ್ಷಿ ತಿಪ್ಪಯ್ಯ’ನವರದು. ಒಡೆಯರು ಶಿಶುವಾಗಿದ್ದಾಗ ಅವರನ್ನು ಸಂರಕ್ಷಿಸಿದ್ದು, ಬೆಳೆಸಿದ್ದು, ಅವರು ಸಿಂಹಾಸನಾಧೀಶರಾದಾಗ ಬೆನ್ನೆಲುಬಾಗಿ ನಿಂತದ್ದು ತಿಪ್ಪಯ್ಯನವರ ವಂಶ ಚರಿತ್ರೆಯಲ್ಲಿ ಮುಖ್ಯವಾಗಿ ಕಾಣುವ ಸಂಗತಿ. ಅಂಥ ಐತಿಹಾಸಿಕ ವಂಶದಲ್ಲಿ ಬಂದವರು ಎಸ್.ಆರ್. ವೆಂಕಟರಾಮಯ್ಯನವರು.
ಸಂಕೇತಿ ಸಮುದಾಯವು ನಗರವಾಸಕ್ಕೆ ತೊಡಗಿಕೊಂಡದ್ದು ಮತ್ತು ಆಧುನಿಕ ವಿದ್ಯಾಭ್ಯಾಸಕ್ಕೆ ತೆರೆದುಕೊಂಡದ್ದು ಬಹಳ ನಿಧಾನವಾಗಿ. ಆದರೆ ಅಂಚೆ ಬಕ್ಷಿ ತಿಪ್ಪಯ್ಯನವರದು ಆಧುನಿಕತೆಗೆ ಬೇಗ ಪ್ರವೇಶಿಸಿದ ಕೆಲವೇ ಸಂಕೇತಿ ಮನೆತನಗಳಲ್ಲಿ ಒಂದು.
ಟಿಪ್ಪು ಸುಲ್ತಾನನ ಆಳ್ವಿಕೆಯಲ್ಲಿಯೂ ತಿಪ್ಪಯ್ಯನವರು ಸಚಿವರಾಗಿದ್ದರು. ಮತಾಂತರ ಪ್ರವೃತ್ತಿಯ ದೌರ್ಬಲ್ಯವಿದ್ದ ಟಿಪ್ಪು ಆಗಾಗ ಹಿಂದೂ ಅಧಿಕಾರಿಗಳಿಗೆ ಕಿರುಕುಳ ಕೊಡುತ್ತಿದ್ದ. ತಮ್ಮ ಪ್ರಾಮಾಣಿಕತೆ, ಬುದ್ಧಿ ಸಾಮರ್ಥ್ಯ. ಕರ್ತೃತ್ವಶೀಲತೆಯಿಂದಲೇ ಈ ಉಪಟಳಗಳಿಂದ ಪಾರಾಗಬೇಕಾಗಿತ್ತು. ಸಂಸ್ಥಾನವು ಎದುರಿಸಿದ ಲೆಕ್ಕ ಪತ್ರಗಳ ಬಿಕ್ಕಟ್ಟೊಂದನ್ನು ಪರಿಹರಿಸಬೇಕಾದ ಜವಾಬ್ದಾರಿಯನ್ನು ಒಮ್ಮೆ ತಿಪ್ಪಯ್ಯನವರಿಗೆ ವಹಿಸಲಾಯಿತು. ಉನ್ನತ ಮುಸಲ್ಮಾನ ಅಧಿಕಾರಿಗಳ ಸುತ್ತ ಹೆಣೆದುಕೊಂಡಿದ್ದ ಈ ಹಗರಣವನ್ನು ಉಪಾಯವಾಗಿ ಕೊನೆಮುಟ್ಟಿಸಬೇಕಾಗಿತ್ತು. ಯಾವ ಮಗ್ಗುಲಿಗೆ ವಾಲಿದರೂ ಕತ್ತಿಯ ಮೊನೆಯ ಅಪಾಯ ಇದ್ದೇ ಇತ್ತು. ಅಂಥ ಸಂದರ್ಭದಲ್ಲಿ ತಿಪ್ಪಯ್ಯನವರು ಶ್ರೀರಂಗಪಟ್ಟಣದ ರಂಗನಾಥನ ಮೊರೆ ಹೊಕ್ಕರು. ಈ ಸಮಸ್ಯೆ ಯಶಸ್ವಿಯಾಗಿ ಬಗೆಹರಿದರೆ ಸ್ವಾಮಿಗೆ ಪುಷ್ಪ ಬೃಂದಾವನೋತ್ಸವ ನಡೆಸುವುದಾಗಿ ಹರಕೆ ಹೊತ್ತರು; ಟಿಪ್ಪು ಮೆಚ್ಚುವ ರೀತಿಯಲ್ಲಿ ಸಮಸ್ಯೆಗೆ ತೆರೆ ಎಳೆದರು; ಎಲ್ಲ ಬಣದ ಮುಸಲ್ಮಾನ ಅಧಿಕಾರಿಗಳೂ ಅನಿವಾರ್ಯವಾಗಿ ಒಪ್ಪಿ ತಟಸ್ಥರಾಗುವಂತೆ ಈ ಸೂಕ್ಷ್ಮ ಕೆಲಸವನ್ನು ನಿರ್ವಹಿಸಿದರು. ತಿಪ್ಪಯ್ಯನವರು ಸನ್ಮಾನಿತರಾದರು. ಅದು ಉತ್ಥಾನ ದ್ವಾದಶಿಯ ದಿನ. ಅಂದೇ ಪುಷ್ಪ ಬೃಂದಾವನೋತ್ಸವವನ್ನೂ ಪ್ರಾರಂಭಿಸಿದರು. ಅದು ಆ ಮನೆತನದವರೇ ನಡೆಸುವ ವಾರ್ಷಿಕ ಉತ್ಸವವಾಗಿ ಮುಂದುವರಿಯಿತು.
ಬಕ್ಷಿ ತಿಪ್ಪಯ್ಯನವರಿಗೆ (ಈಗಿನ) ಹಾಸನ ಜಿಲ್ಲೆಯಲ್ಲಿ ಹಲವು ಇನಾಂ ಗ್ರಾಮಗಳಿದ್ದವು. ಅಲ್ಲಿ ಬೆಳೆದಿರುತ್ತಿದ್ದ ಗಂಧದ ಮರಗಳನ್ನು ಕೊಂಡು ಸರ್ಕಾರ ಹಣ ಕೊಡುತ್ತಿತ್ತು. ಹಾಗೆ ಬಂದ ‘ಗಂಧದ ಹಣ’ ದಿಂದ ಈ ಉತ್ಸವ ಅನೂಚಾನವಾಗಿ ನಡೆದುಕೊಂಡು ಹೋಗಬೇಕೆಂದು ತಿಪ್ಪಯ್ಯನವರು ‘ವಿಲ್’ ಬರೆದಿಟ್ಟರು. ಅದರಂತೆ ಅದು ತಲೆಮಾರುಗಳನ್ನು ದಾಟಿ ನಡೆದುಕೊಂಡು ಬಂತು. ಮುಂದೆ ಇನಾಂ ಪದ್ಧತಿ ರದ್ದು ಆಯಿತು. ಈ ವಂಶದವರು ಹಲವು ಕಡೆ ಚದುರಿದ್ದರು. ಉತ್ಸವವೂ ನಿಂತಿತು. ಇಂಥ ಸಂದರ್ಭದಲ್ಲಿ ಒಮ್ಮೆ ಸಬ್‌ಓವರ್‌ಸೀಯರ್ ಟಿ. ರಂಗಸ್ವಾಮಯ್ಯನವರು ಶ್ರೀರಂಗಪಟ್ಟಣಕ್ಕೆ ವರ್ಗವಾಗಿ ಬಂದರು. ರಾಮನಾಥಪುರ, ಕಟ್ಟೆಪುರದ ನಾಲೆ ಕಾಮಗಾರಿಯನ್ನು ನಿರ್ವಹಿಸಿ ಜನಪ್ರಿಯರಾಗಿದ್ದವರು ಅವರು. ಈ ಉತ್ಸವವನ್ನು ಮುಂದುವರೆಸಬೇಕೆಂಬ ಪ್ರೇರಣೆಯಾಯಿತು; ಮತ್ತೆ ನಡೆಸತೊಡಗಿದರು. ಅವರ ಮಗ ಎಸ್.ಆರ್. ವೆಂಕಟರಾಮಯ್ಯನವರು ತಮಗೆ ನೌಕರಿ ಇಲ್ಲದಾಗಲೂ ಬಿಡದೆ ಅದನ್ನು ಮುಂದುವರೆಸಿದರು. ಮುಂದೆ ನೌಕರಿ ದೊರೆತಾಗ, ‘ಕೆಲಸ ಇಲ್ಲದಾಗಲೂ ಉತ್ಸವ ಮಾಡಿಸಿದ್ದೆ; ದೇವರು ಈಗ ಕೆಲಸ ಕೊಡಿಸಿದ್ದಾನೆ; ಈಗ ಬಿಡುವುದುಂಟೆ?’ ಎಂಬ ಭಕ್ತಿ ವಿಶೇಷದಿಂದ ಪರಂಪರೆಯನ್ನು ಬೆಳೆಸಿದರು.
ಬಕ್ಷಿ ತಿಪ್ಪಯ್ಯನವರ ವಂಶದವರಿಗೆ ‘ಮೈಸೂರು ಮನೆಯವರು’ ಎಂಬ ನಾಮಧೇಯವಿದೆ. ಅದರ ಮೂರು ಕವಲುಗಳು ‘ಹೊಸಮನೆ’, ‘ಹಿಂದಿನ ಮನೆ’, ‘ತೊಟ್ಟಿ ಮನೆ’ ಎನಿಸಿವೆ. ವೆಂಕಟರಾಮಯ್ಯನವರು ‘ಹೊಸಮನೆ’ ಕವಲಿಗೆ ಸೇರಿದವರು. ಈ ಮೂರೂ ಕವಲುಗಳೂ ಪರ್ಯಾಯವಾಗಿ ಮೂರು ವರ್ಷಗಳಿಗೊಮ್ಮೆ ಈ ಉತ್ಸವದ ಹೊಣೆ ಹೊತ್ತು ಇಂದಿಗೂ ನಡೆಸಿಕೊಂಡು ಬರುತ್ತಿವೆ.

ನಿರ್ದೇಶನ : ಈ ಕೆಳಗಿನ ಕವನವನ್ನು ಓದಿ, ಅನುಸರಿಸಿ ಬರುವ ಪ್ರಶ್ನೆಗಳಿಗೆ (ಪ್ರಶ್ನೆ ಸಂಖ್ಯೆ : 100-105) ಸೂಕ್ತ ಉತ್ತರವನ್ನು ಆರಿಸುವುದರ ಮೂಲಕ ಉತ್ತರಿಸಿ.
ನಿಮ್ಮೊಡನಿದ್ದೂ ನಿಮ್ಮಂತಾಗದೆ ಜಗ್ಗಿದ ಕಡೆ ಬಾಗದೆ
ನಾನು ನಾನೇ ಆಗಿ, ಈ ನೆಲದಲ್ಲಿ ಬೇರೊತ್ತಿದರೂ ಬೀಗಿ
ಪರಕೀಯನಾಗಿ ತಲೆಯೆತ್ತುವುದಿದೆ ನೋಡಿ
ಅದು ಬಲುಕಷ್ಟದ ಕೆಲಸ.
ವೃತ್ತದಲ್ಲಿ ಉನ್ಮತ್ತರಾದ
ನಿಮ್ಮ ಕುಡಿತ ಕುಣಿತ ಕೂಟಗಳು ಕೆಣಕಿ
ಕುಣಿಕೆ ಎಸೆದಿದ್ದರೂ
ಪಂಚೇಂದ್ರಿಯಕ್ಕೆ ಲಗಾಮು ಜಡಿದು ಜಾರದೆ ನಿಮ್ಮತ್ತ :
ಸಂಯಮವನ್ನೇ ಪೋಷಿಸಿ ಸಾಕುತ್ತ
ರೇಖೆಯಲ್ಲೇ ದೊಂಬರಾಟ ನಡೆಸುವುದಿದೆ ನೋಡಿ
ಅದು ಬಲು ಕಷ್ಟದ ಕೆಲಸ.

ನಿರ್ದೇಶನ : ಈ ಕೆಳಗಿನ ಲೇಖನ ಭಾಗವನ್ನು ಓದಿ, ಅನುಸರಿಸಿ ಬರುವ ಪ್ರಶ್ನೆಗಳಿಗೆ (ಪ್ರಶ್ನೆ ಸಂಖ್ಯೆ : 121-128) ಸೂಕ್ತ ಉತ್ತರವನ್ನು ಆರಿಸುವುದರ ಮೂಲಕ ಉತ್ತರಿಸಿ.
ಗ್ರೀಕ್ ಭಾಷೆಯಲ್ಲಿ ಮುಥೋಸ್ ಎನ್ನುವ ಪದವು ಚಾಲ್ತಿಯಲ್ಲಿ ಇದೆ. ಅದನ್ನು ಪುರಾಣಗಳಿಗೆ ಅನ್ವಯ ಮಾಡುತ್ತಾರೆ. ಮಿಥಾಲಜಿ ಎನ್ನುವುದನ್ನೇ ಮುಥೋಸ್ ಎಂದು ಕರೆಯುತ್ತಾರೆ. ಇದು ವಸ್ತುನಿಷ್ಟ ಸತ್ಯವನ್ನು ಹೇಳುವುದಿಲ್ಲ. ಸಮಾಜ ಮತ್ತು ಅದರ ಉಗಮವನ್ನು ಪುರಾಣದಲ್ಲಿ ಹುಡುಕುವ ಯತ್ನವನ್ನು ಇದು ಮಾಡುತ್ತದೆ. ಇದು ಸತ್ಯ ಕಥೆಯನ್ನು ಹೇಳದೆ ಇರುವುದರಿಂದ ಇದರ ಬಗ್ಗೆ ಕೆಲವು ವಾಗ್ವಾದಗಳೂ ಇವೆ. ಮಿಥೋಸ್ ಎಂದರೆ ಕಥನ ಮತ್ತು ವರದಿ ಎನ್ನುವ ಅರ್ಥವೂ ಇದೆ. ಕತೆಯನ್ನು ಹೇಳು ಎನ್ನುವುದು ಇದರ ಭಾವಾರ್ಥವಾಗಿದೆ. ಹಾಗೆಯೇ ಭಾಷಣ ಮತ್ತು ನಿರೂಪಣೆ ಎನ್ನುವುದನ್ನು ಇದು ಸೂಚಿಸುತ್ತದೆ. ಇದು ಒಂದು ಸಂಸ್ಕೃತಿಯ ನಂಬಿಕೆಯನ್ನು ಹೇಳುತ್ತದೆ. ಇದರಲ್ಲಿ ಅನೇಕ ಘಟನೆಗಳು ಇರುತ್ತವೆ. ಅದರಲ್ಲಿ ಭಿನ್ನತೆಗಳು ಇಲ್ಲ. ಯಾವುದನ್ನು ನಾವು ಕಥನ ಎಂದು ಹೇಳುತ್ತೇವೆಯೋ ಅದರಲ್ಲಿ ವಿವಿಧ ಘಟನೆಗಳು ಇರುತ್ತವೆ. ಅದಕ್ಕೆ ನಿಯಮಗಳು ಇರುತ್ತವೆ. ಆ ನಿಯಮವು ಸಾಹಿತ್ಯ ಮತ್ತು ಅದರ ಅಭಿವ್ಯಕ್ತಿಗೆ ಸಂಬಂಧಪಟ್ಟದ್ದೂ ಹೌದು. ಷಟ್ಪದಿ ಮತ್ತು ಚಂಪೂ ಕಾವ್ಯಗಳಲ್ಲಿ ಸಾಹಿತ್ಯ ಕಥನಗಳು ಇದ್ದವು. ಅವುಗಳಿಗೆ ಒಂದು ರೂಪವೂ ಇತ್ತು. ಅಪೂರ್ಣವಾದ ಕಥನ ಎನ್ನುವುದು ಇರಲಿಲ್ಲ. ಈಗಲೂ ನಾವು ಕತೆಯನ್ನು ಹೇಳುತ್ತೇವೆ. ಅದು ಅಪೂರ್ಣವಾಗಿದೆ ಎಂದು ಹೇಳಲಾಗುವುದಿಲ್ಲ. ಸಾಹಿತ್ಯ ಎಂದರೆ ಏನದು ಎನ್ನುವ ಪ್ರಶ್ನೆಯನ್ನು ಕೇಳಿದರೆ ಈವತ್ತು ಕೂಡಾ ನಾವು ಹಿಂದೆ ಏನು ಹೇಳಿದರೋ ಅದನ್ನೇ ಹೇಳುತ್ತೇವೆ. ವ್ಯಾಖ್ಯೆಗಳು ಹೆಚ್ಚು ಬದಲಾಗಿಲ್ಲ. ಸಾಹಿತ್ಯ ಪ್ರಕಾರಗಳು, ಸಾಹಿತ್ಯದ ರೂಪದ ಪ್ರಶ್ನೆಗಳಿಗೆ ನಾವು ಹಿಂದೆ ಏನು ಹೇಳಿದರೋ ಅದನ್ನೇ ಪ್ರತಿಪಾದಿಸುತ್ತೇವೆ. ಸ್ವಲ್ಪ ಬದಲಾವಣೆಯನ್ನು ಮಾಡಿದ್ದೇವೆ ಅಷ್ಟೇ. ಕೆಲವು ಸಾಹಿತ್ಯದ ರೂಪಗಳಿಗೆ ಹೆಚ್ಚು ಮನ್ನಣೆಯು ದೊರೆತಿದೆ. ಅದರಲ್ಲಿಯೂ ಈವತ್ತು ಕಾದಂಬರಿ ಪ್ರಕಾರವು ಹೆಚ್ಚು ಜನಪ್ರಿಯವಾಗಿದೆ. ಅದು ಆಧುನಿಕ ಕಾಲದ ಸೃಷ್ಟಿಯೂ ಹೌದು. ಹೊಸದಾದ ಸಾಮಾಜಿಕ ಸನ್ನಿವೇಶಕ್ಕೆ ಅನುಸಾರವಾಗಿ ಅದು ಇದೆ. ಅದರಲ್ಲಿ ನಾವು ನಮ್ಮ ಅನುಭವವನ್ನು ಹೇಳಬಹುದು. ಅದರ ಜೊತೆಗೆ ಅದರಲ್ಲಿ ನಮ್ಮ ಅಭಿವ್ಯಕ್ತಿಯನ್ನು ಸಾಧಿಸಬಹುದು. ಉಳಿದ ಪ್ರಕಾರಕ್ಕಿಂತ ಇದು ಭಿನ್ನವಾಗಿದೆ. ಕಾದಂಬರಿಯ ಸಂಯೋಜನೆಯು ಬೇರೆಯಾಗಿದೆ. ಕಾದಂಬರಿ ಮತ್ತು ಅದರ ಉದ್ದೇಶವೂ ಬೇರೆಯಾಗುತ್ತದೆ. ಬದಲಾಗುತ್ತಿರುವ ಸಮಾಜವನ್ನು ಹೇಳುವುದು ಭಿನ್ನವಾಗಿ ಸಮಾಜವು ಪಲ್ಲಟವಾಗುತ್ತಿದೆ ಎಂದು ಹೇಳಲು ಸಾಧ್ಯವಾಗುವುದು ಕೂಡಾ ಕಾದಂಬರಿಯಲ್ಲಿ, ಅದನ್ನು ನಾವು ಮುಸ್ಸಂಜೆಯ ಕಥಾ ಪ್ರಸಂಗದಲ್ಲಿ ಕಾಣುತ್ತೇವೆ. ಅದರಲ್ಲಿ ಮಹಾಕಾವ್ಯದ ಗುಣವಿದೆ., ಅದರಲ್ಲಿ ನಾಟಕದ ಅಂಶವೂ ಇದೆ. ಅದರಲ್ಲಿ ಅಭಿಜಾತ ಪರಂಪರೆಯು ಗುಣವೂ ಇದೆ. ಮುಸ್ಸಂಜೆಯ ಕಥಾ ಪ್ರಸಂಗದಲ್ಲಿ ನಾವು ಇದನ್ನು ಕಾಣುತ್ತೇವೆ. ಅರಿಸ್ಟಾಟಲನ ಪೊಯೆಟಿಕ್ಸ್ ಕೃತಿಯಲ್ಲಿ ಒಂದು ವಿಚಾರವು ಬರುತ್ತದೆ. ಅದು ಕ್ರಿಯೆ ಮತ್ತು ಅದರ ಐಕ್ಯತೆಯನ್ನು ಹೇಳುತ್ತದೆ. ನಿರೂಪಣೆಯ ದೃಷ್ಟಿಯಿಂದ ಇದು ಅತ್ಯಂತ ಮಹತ್ವದ್ದು. ಯಾವುದನ್ನು ನಾವು ಚಾರಿತ್ರಿಕವಾದ ಮಹಾಕಾವ್ಯ ಎಂದು ಹೇಳುತ್ತೇವೆಯೋ ಅದರಲ್ಲಿ ಕ್ರಿಯೆ, ಕಾಲ ಮತ್ತು ವಸ್ತುವಿನ ಏಕತೆಯನ್ನು ನಾವು ಕಾಣುತ್ತೇವೆ. ಅವುಗಳಲ್ಲಿ ಕಾಲವು ಅತ್ಯಂತ ವಿಸ್ತಾರವಾಗಿರುತ್ತದೆ. ಕೃತಿಯ ಒಳಗಿನ ಕಾಲ ಮತ್ತು ಅದರ ನಿರೂಪಣೆಗೆ ಒಂದು ಸಂಬಂಧವು ಇದೆ.
ಚರಿತ್ರೆಯಲ್ಲಿ ನಾವು ಕೆಲವು ಪ್ರಾಚೀನ ಮಾದರಿಗಳನ್ನು ಕಾಣಬಹುದು. ಇದನ್ನು ಪ್ರೈ ಎನ್ನುವ ಚಿಂತಕ ಪ್ರಾಗ್ರೂಪ ಎಂದು ಕರೆಯುತ್ತಾನೆ. ವಿಶ್ವದ ಸಂಗತಿಗಳು ಎಲ್ಲಾ ಕಡೆಗೆ ಒಂದೇ ರೀತಿಯಲ್ಲಿ ಇರುತ್ತದೆ. ಯಾವುದನ್ನು ಅವನು ನಿಯಮ ಬದ್ಧವಾದ ರೂಪಗಳು ಎಂದು ಹೇಳುತ್ತಾನೆಯೋ ಅದರಲ್ಲಿ ಅಲ್ಪ ಸ್ವಲ್ಪ ವ್ಯತ್ಯಾಸಗಳು ಇರುತ್ತವೆ. ಜಗತ್ತಿನಲ್ಲಿ ಕೆಲವು ವಿಚಾರಗಳ ನಿರೂಪಣೆಯು ಒಂದೇ ರೀತಿಯಲ್ಲಿ ಇರುತ್ತವೆ. ಕಥನವನ್ನು ನಾವು ಒಂದೇ ಚಹರೆಯಲ್ಲಿ ಗುರುತಿಸುತ್ತೇವೆ. ಅದೇ ರೀತಿಯಲ್ಲಿ ಹಾಡುಗಳು ಕೂಡ ಒಂದು ಮಾದರಿಯಲ್ಲಿ ಇರುತ್ತದೆ. ನಾಟಕವು ದೃಶ್ಯಾತ್ಮಕವಾದ ಕಲೆಯು ಆಗಿದ್ದು, ಅದರಲ್ಲಿ ಹೆಚ್ಚು ಭಿನ್ನತೆಗಳಿರುವುದು ಸಾಧ್ಯವಿಲ್ಲ. ಇದಕ್ಕೆ ಕಾರಣವೂ ಸ್ಪಷ್ಟ. ಚರಿತ್ರೆಯು ಇದನ್ನು ಹೇಳುತ್ತದೆ. ಕಥನಗಳು ಮತ್ತು ಕಾದಂಬರಿಗಳು ಹಾಗೂ ಅವುಗಳ ಬೇರೆ ಬೇರೆ ಮಾದರಿಗಳು ಒಂದೇ ಮೂಲದಿಂದ ಬಂದಿರುತ್ತವೆ.

ನಿರ್ದೇಶನ : ಈ ಕೆಳಗಿನ ಲೇಖನ ಭಾಗವನ್ನು ಓದಿ, ಅನುಸರಿಸಿ ಬರುವ ಪ್ರಶ್ನೆಗಳಿಗೆ (ಪ್ರಶ್ನೆ ಸಂಖ್ಯೆ : 129-135) ಸೂಕ್ತ ಉತ್ತರವನ್ನು ಆರಿಸುವುದರ ಮೂಲಕ ಉತ್ತರಿಸಿ.
ಇನ್ನೂ ಕತ್ತಲು ಪೂರ್ತಿ ಕರಗಿರಲಿಲ್ಲ, ಪಾಟೀಲರು ನಿಧಾನವಾಗಿ ಕೋಣೆಯಿಂದ ಪಡಸಾಲೆಗೆ ಬಂದು ಕುರ್ಚಿಯಲ್ಲಿ ಕುಳಿತರು. ಬದಿಯ ಟೇಬಲಿನ ಮೇಲೆ ಜೇನುತುಪ್ಪ, ನಿಂಬೇರಸ ಬೆರೆಸಿದ ಪಾನಕ ತುಂಬಿದ್ದ ತಂಬಿಗೆಯಿತ್ತು. ರೂಢಿಯಂತೆ ಎತ್ತಿಕೊಂಡು ಕುಡಿಯತೊಡಗಿದರು. ಒಂದೆರಡು ಗುಟುಕು ಕುಡಿದಿರಬೇಕು. ರುಚಿಗೆ ಮನಸ್ಸು ಉತ್ಸಾಹಗೊಂಡಿತು. ಹತ್ತಾರು ವರ್ಷಗಳಿಂದ ಆಪ್ತರಾಗಿದ್ದ ಆಯುರ್ವೇದ ವೈದ್ಯರೊಬ್ಬರು ಇಂಥ ಪಾನಕ ಕುಡಿಯಲು ಹೇಳುತ್ತಲೇ ಇದ್ದರು. ಆದರೆ ಮುಂಜಾನೆ ಎದ್ದರೆ ಸಾಕು ಮನಸ್ಸು ಚಹಾಕ್ಕೆ ಹಾತೊರೆಯುತ್ತಿತ್ತು. ಚಹ ಕುಡಿದರೆ ಮಾತ್ರ ಸಮಾಧಾನವಾಗುತ್ತಿತ್ತು. ಒಂದೆರಡು ಸಲ ಪಾನಕ ಕುಡಿಯಲು ಯತ್ನಿಸಿ ಕುಡಿದರೂ, ಪುನಃ ಚಹ ಕುಡಿಯುವ ತನಕ ಮನಸ್ಸಿಗೆ ನೆಮ್ಮದಿಯಾಗಿರಲಿಲ್ಲ! ಹೀಗಾಗಿ ಜೇನುತುಪ್ಪ ನಿಂಬೇರಸದ ಪಾನಕ ಕುಡಿಯಬೇಕೆಂಬ ಪ್ರಯತ್ನ ಕೈಬಿಟ್ಟಿದ್ದರು. ಪಾಟೀಲರು ಈ ಮನೆಗೆ ಬಂದು ಒಂದು ವಾರ ಕಳೆದಿತ್ತು. ಇಲ್ಲಿ ಪಾನಕ ಕುಡಿಯುವುದು ಅನಿವಾರ್ಯವಾಗಿ ರೂಢಿಯಾಗಿತ್ತು. ಈಗ ಪಾನಕ ಕುಡಿಯುತ್ತಿದ್ದರೆ ತನು ಮನಕ್ಕೆ ಹಿತವಾಗುತ್ತಿತ್ತು. ಪಾನಕವನ್ನು ಸವಿಯತೊಡಗಿದ್ದರು. ಕಳೆದ ಹದಿನೈದು ವರ್ಷಗಳಿಂದ ಜೀವಕ್ಕೆ ನೆಮ್ಮದಿ ಸಿಕ್ಕಿದ್ದು ಏನಾದರು ಇದ್ದರೆ ಅದು ಕಳೆದ ಈ ವಾರ–ಹತ್ತು ದಿನಗಳಲ್ಲಿ ಮಾತ್ರ ಎಂದು ಎನ್ನಿಸತೊಡಗಿತು. ಈ ಮನೆಯ ಸಿದ್ರಾಮಪ್ಪ ಮಾಸ್ತರ, ಹೆಂಡತಿ ಅಮರಮ್ಮ ದಂಪತಿಗಳು ಬದುಕುತ್ತಿರುವ ವಿಧಾನ ಕಂಡು ಪರಮಾಶ್ಚರ್ಯವಾಗಿತ್ತು. ಪಾಟೀಲರಿಗೆ. ಈ ಒಂಟಿ ಮನೆಗೆ ಬಂದ ದಿನ ರಾತ್ರಿವಾಸದ ಅನುಭವದಿಂದ, ಯಾವ ಶಿಕ್ಷೆಯ ಪರಿಣಾಮವಾಗಿ ಈ ದಂಪತಿಗಳು ಈ ರೀತಿಯಲ್ಲಿ ಜೀವಿಸುತ್ತಿದ್ದಾರೆ ಎಂದು ಅನ್ನಿಸಿ ಪಾಟೀಲರಿಗೆ ಬೇಸರವಾದದ್ದು ನಿಜ ಆದರೆ ಮೂರು ದಿನ ಕಳೆಯುವ ಹೊತ್ತಿಗೆ ‘ಆಹ್ಹಾ! ಅನ್ನಿಸಿಬಿಟ್ಟಿತು. ಮಾಸ್ತಾರರು ಕುಟುಂಬದ ಜತೆಗೆ ಮಾಡುತ್ತಿದ್ದ ನಿತ್ಯದ ಕೆಲಸಗಳನ್ನು ನೋಡುತ್ತಿದ್ದರೆ, ಮಕ್ಕಳು ಕೂಡಿಕೊಂಡು ಗಂಡ–ಹೆಂಡತಿಯ ಸಂಸಾರದ ಆಟ ಆಡುತ್ತವಲ್ಲ .... ಅದನ್ನು ಕಂಡಂತಿತ್ತು. ಮಾಸ್ತಾರರೇ ಹುಟ್ಟಿ ಬೆಳೆದ ಈ ಊರಲ್ಲಿ ಇರದೆ ಇದೇ ಊರಿನ ಹೊರಗೆ ಹೊಲದಲ್ಲಿ ಮನೆ ಕಟ್ಟಿಕೊಂಡು ಇದ್ದರು. ಹೊತ್ತು ಮುಳುಗಿದ ಬೆನ್ನಲ್ಲೇ ಉಣ್ಣುವುದು, ಉಂಡು ಕಂದೀಲು ಬೇಳಕಿನಲ್ಲಿ ಕುಳಿತು ಮಾತುಕತೆಯಾಡುವುದು, ಮನೆಯ ಹೊರಗೆ ಬೆಳದಿಂಗಳಲ್ಲಿ ಸುತ್ತಾಡಿ ಬಂದು ಮಲಗುವುದು. ಬೆಳಗಾಗುವ ಮುನ್ನವೇ ಏಳುವುದು, ಕಟ್ಟಿಕೊಂಡಿರುವ ಆಕಳು, ಅದರ ಅಂಕಣವನ್ನು ಹಸನ ಮಾಡುವುದು, ಹಾಲು ಹಿಂಡಿಕೊಳ್ಳುವುದು, ಮನೆಯ ಸುತ್ತಮುತ್ತಲಿನ ತೋಟವನ್ನು ಸುತ್ತಾಡಿ ಆರೈಕೆ ಮಾಡುವುದು, ಪಕ್ಕದ ಕಾಲುವೆಯಲ್ಲಿ ಬಟ್ಟೆಬರೆ ಒಗೆಯುವುದು ಒಂದೇ ಎರಡೇ ಇಂಥ ಹಲವು ಕೆಲಸಗಳನ್ನು ದಣಿವಿಲ್ಲದೆ, ಬೇಸರಿಸದೆ ಇಬ್ಬರು ಕೂಡಿಯೇ ಮಾಡುವುದನ್ನು ಪಾಟೀಲರು ಕಂಡು ತಾವು ಕೈ ಜೋಡಿಸಲು ಹಂಬಲಿಸಿದರು. ಮೊನ್ನೆ ಮಾಸ್ತಾರರು ಕಾಲುವೆಯಲ್ಲಿ ಬಟ್ಟೆ ಒಗೆಯುತ್ತಿದ್ದಾಗ ಹೆಂಡತಿಯ ಸೀರೆ ಬಟ್ಟೆಗಳೂ ಕಂಡು ತಡೆಯಲಾರದೆ ಪಾಟೀಲರು, ‘ಸಿದ್ರಾಮು, ಸೀರೆ ಒಗೆಯುವುದು ನಿನಗೆ ಹೇಗೆ ಸಾಧ್ಯವಾಯ್ತು ? ಅದಕ್ಕೂ ಮಾನಸಿಕ ಸಿದ್ಧತೆ ಬೇಕಲ್ಲ ? ತಪ್ಪು ತಿಳಿಯಬಾರದು.....’ ಎಂಬ ಮಾತು ಮುಗಿಯುವ ಮುನ್ನವೇ, ತಪ್ಪಾಕ ತಿಳಿಲಿ ಬಿಡು, ನಾನು ಉಡುವುದು ಪಂಜೆ, ಆಕೆ ಉಡುವುದು ಸೀರೆ, ಅವೆಲ್ಲ ಬಟ್ಟೆಗಳಲ್ಲೇನಪ್ಪ ? ಬಟ್ಟೆಗಳಂತ ಒಗಿತೀನಿ ಅಷ್ಟೆ! ಎಂದು ಮಾಸ್ತರರು ತಣ್ಣಗೆ ಅಂದಿದ್ದರು. ಮಾತು ಪಾಟೀಲರಿಗೆ ತಗುಲಿತು. ತಮ್ಮ ಹೆಂಡತಿಯನ್ನು ನೆನಪಿಸಿಕೊಂಡಿದ್ದರು. ಬಾತ್ ರೂಮಿಗೆ ಸ್ನಾನಕ್ಕೆ ಹೋದಾಗ, ಅಲ್ಲೇನಾದರೂ ಹೆಂಡತಿಯ ಬಟ್ಟೆ ಬರೆ ಕಾಣಿಸಿದರೆ ಸಿಡಿಮಿಡಿಯಾಗುತ್ತಿತ್ತು. ಅದನ್ನು ಪಾಟೀಲರು ಕಣ್ಣ ಮುಂದೆ ತಂದುಕೊಂಡರು...
“ನಿಮ್ಗ ಈ ಪಾನಕ ಬ್ಯಾಡನಿಸಿದರೆ ಬುಟ್ಟು ಬುಡ್ರಿ, ಹಾಲು ತಂದು ಕೊಡ್ತೀನಿ” ಅಂದಳು. ಅಡಿಗೆ ಮನೆಯಿಂದ ಪಡಸಾಲೆಗೆ ಬಂದ ಅಮರಮ್ಮ, ಏನನ್ನೋ ನೆನೆಯುತ್ತ ಕೈಯಲ್ಲಿ ಪಾನಕದ ತಂಬಿಗೆ ಹಿಡಿದು ಕುಳಿತಿದ್ದ ಪಾಟೀಲರನ್ನು ಅನುಮಾನಿಸಿ ಕೇಳಿದ್ದಳು.